monumenta.ch > Hieronymus > sectio 8 > sectio 6 > 5 > sectio 2 > Ioannes, 14 > bsbClm6343.36 > sectio 24 > sectio 65 > bnf9389.269 > sectio 2 > bsbClm6224.245 > sectio 18 > sectio 8 > csg458.113 > sectio 14 > sectio 44 > csg48.259 > 18 > sectio 26 > sectio 39 > bsbClm6343.35 > sectio 39 > sectio 17 > sectio 3 > sectio 15 > ad Romanos, 8 > Matthaeus, 11 > csg48.196 > csg458.105 > sluMscr.Dresd.A.145.b.26 > bnfGrec107.293 > bnf10439.203 r > 8 v > sectio 9 > sectio 4 > sectio 16 > sectio 11 > bkeCod.15.93v > sectio 21 > sectio 30 > 32 > sectio 29 > csg48.109 > sectio 40 > sectio 21 > sectio 2 > sectio 4 > sectio 11 > Matthaeus, 5 > bsbClm6224.208 > 20 > 12 > bnf17226.152 > sectio 59 > Psalmi, 107 > sectio 19 > sectio 24 > Proverbia, 16 > Matthaeus, 11 > sectio 18 > sectio 67 > sectio 29 > sectio 22 > bsbClm6343.11 > sectio 14 > sectio 45 > bnf17226.140 > 6 > Lucas, 2 > sectio 26 > csg75.699 > sectio 19 > sectio 6 > uwbM.p.th.q.1a.175 > sectio 7 > uwbM.p.th.f.69.120 > sectio 20 > 3 > uwbM.p.th.q.1a.258 > sectio 17 > Ieremias, 2 > sectio 23 > sectio 24 > sectio 10 > bnf9389.360 > sectio 21 > sectio 3 > sectio 3 > csg48.322 > sectio 16 > sectio 14 > sectio 41 > sectio 2 > sectio 5 > sectio 12 > csg457.76 > sectio 2 > sectio 5 > sectio 10 > csg48.36 > csg75.698 > bnf10439.16 r > bsbClm6224.176 > sectio 4 > sectio 6 > Ioannes, 3 > sectio 12 > sectio 14 > sectio 4 > bnf17226.38 > Ecclesiastes, 11 > sectio 22 > bnfGrec107.967 > bsbClm6224.248 > sectio 13 > uwbM.p.th.q.1a.121 > Matthaeus, 8 > csg7.104 > csg68.299 > sluMscr.Dresd.A.145.b.94 > tblHarleyMS1775.19v > sectio 14 > uwbM.p.th.f.68.244 > bnf10439.63 r > sectio 5 > sectio 16 > csg102.174 > bnf11947.216 v > sectio 6 > bsbClm6224.252 > sectio 34 > csg51.19 > sectio 24 > sectio 5 > sectio 7 > sectio 6 > sectio 16 > bnf17226.188 > sectio 3 > ad Corinthios II, 12 > sectio 15 > sectio 30 > bsbClm6224.31 > sectio 2 > bnf9389.70 > bnf10439.202 v > Actus, 11 > bsbClm6224.430 > sectio > bsbClm6224.251 > Matthaeus, 10 > sectio 31 > sectio 36 > sectio 32 > bsbClm6343.42 > csg458.77 > sectio 8 > sectio 11

Word Selection for Searching

Report an Error in this Sectio
Gregorius Magnus, Homiliae in Evangelia, 2, 34, 11
Sed quid prodest nos de angelicis spiritibus ista perstringere, si non studeamus haec etiam ad nostros profectus congrua consideratione derivare? Quia enim superna illa civitas ex angelis et hominibus constat, ad quam tantum credimus humanum genus ascendere, quantos illic contigit electos angelos remansisse, sicut scriptum est: Statuit terminos gentium secundum numerum angelorum Dei , debemus et nos aliquid ex illis distinctionibus supernorum civium ad usum nostrae conversationis trahere, nosque ipsos ad incrementa virtutum bonis studiis inflammare. Quia enim tanta illuc ascensura creditur multitudo hominum, quanta multitudo remansit angelorum, superest ut ipsi quoque homines qui ad coelestem patriam redeunt ex eis agminibus aliquid illuc revertentes imitentur. Distincte namque conversationes hominum singulorum agminum ordinibus congruunt, et in eorum sortem per conversationis similitudinem deputantur. Nam sunt plerique qui parva capiunt, sed tamen haec eadem parva pie annuntiare fratribus non desistunt. Isti itaque in angelorum numerum currunt. Et sunt nonnulli qui, divinae largitatis munere refecti, secretorum coelestium summa et capere praevalent, et nuntiare. Quo ergo isti nisi inter archangelorum numerum deputantur? Et sunt alii qui mira faciunt, signa valenter operantur. Quo ergo isti nisi ad supernarum virtutum sortem et numerum congruunt? Et sunt nonnulli qui etiam de obsessis corporibus malignos spiritus fugant, eosque virtute orationis, et vi acceptae potestatis eiiciunt. Quo itaque isti meritum suum nisi inter potestatum coelestium numerum sortiuntur? Et sunt nonnulli qui acceptis virtutibus etiam electorum hominum merita transcendunt; cumque et bonis meliores sunt, electis quoque fratribus principantur. Quo ergo isti sortem suam nisi inter principatuum numeros acceperunt? Et sunt nonnulli qui sic in semetipsis cunctis vitiis omnibusque desideriis dominantur, ut ipso iure munditiae dii inter homines vocentur; unde et ad Moysen dicitur: Ecce constitui te deum Pharaonis . Quo ergo isti nisi inter numeros dominationum currunt? Et sunt nonnulli qui, dum sibimetipsis vigilanti cura dominantur, dumque se sollicita intentione discutiunt, divino timori semper inhaerentes, hoc in munere virtutis accipiunt, ut iudicare recte et alios possint. Quorum profecto mentibus dum divina contemplatio praesto est, in his velut in throno suo Dominus praesidens, aliorum facta examinat, et cuncta mirabiliter de sua sede dispensat. Quid ergo isti nisi throni sui conditoris sunt? vel quo nisi ad supernarum sedium numeros ascribuntur? Per quos dum sancta Ecclesia regitur, plerumque de quibusdam suis infirmis actibus etiam electi iudicantur. Et sunt nonnulli qui tanta Dei ac proximi dilectione pleni sunt, ut cherubim iure nominentur. Quia enim, ut praefati sumus, cherubim plenitudo scientiae dicitur, et Paulo dicente didicimus quia plenitudo legis est charitas , omnes qui Dei et proximi charitate caeteris amplius pleni sunt meritorum suorum sortem inter cherubim numeros perceperunt. Et sunt nonnulli qui, supernae contemplationis facibus accensi, in solo conditoris sui desiderio anhelant, nihil iam in hoc mundo cupiunt, solo aeternitatis amore pascuntur, terrena quaeque abiiciunt, cuncta temporalia mente transcendunt, amant et ardent, atque in ipso suo ardore requiescunt, amando ardent, loquendo et alios accendunt, et quos verbo tangunt, ardere protinus in Dei amore faciunt. Quid ergo istos nisi seraphim dixerim, quorum cor in igne conversum lucet et urit, quia et mentium oculos ad superna illuminant, et compungendo in fletibus vitiorum rubiginem purgant. Qui ergo ita ad amorem sui conditoris inflammati sunt quo nisi inter seraphim numerum sortem suae vocationis acceperunt? 12. Sed haec, fratres charissimi, me loquente, introrsus vos ad vosmetipsos reducite, secretorum vestrorum merita cogitationesque discutite. Videte si quid iam boni vobiscum intus agitis, videte si in numero horum agminum, quae breviter tangendo perstrinximus, sortem vestrae vocationis invenitis. Vae autem animae quae in se de his bonis quae enumeravimus minime aliquid recognoscit, eique adhuc vae deterius imminet, si et privatam se donis intelligit, et nequaquam gemit. Quisquis ergo talis est, fratres mei, gemendus est valde, quia non gemit. Pensemus ergo accepta electorum munera, et virtute qua possumus ad amorem tantae sortis anhelemus. Qui in se donorum gratiam minime recognoscit gemat. Qui vero in se minora cognoscit, aliis maiora non invideat, quia et supernae illae distinctiones beatorum spirituum ita sunt conditae, ut aliae aliis sint praelatae. Fertur vero Dionysius Areopagita, antiquus videlicet et venerabilis Pater, dicere (De Coel. Hierarch. cap. 7, 9, 13) quod ex minoribus angelorum agminibus foras ad explendum ministerium vel visibiliter vel invisibiliter mittuntur, scilicet quia ad humana solatia ut angeli aut archangeli veniunt. Nam superiora illa agmina ab intimis nunquam recedunt, quoniam ea quae praeeminent usum exterioris ministerii nequaquam habent. Cui rei illud videtur esse contrarium quod Isaias dicit: Et volavit ad me unus de seraphim, et in manu eius calculus, quem forcipe tulerat de altari, et tetigit os meum . Sed in hac prophetae sententia vult intelligi quia ii spiritus qui mittuntur eorum vocabulum percipiunt quorum officium gerunt. Qui enim, ut peccata locutionis incendat, de altari angelus carbonem portat, seraphim vocatur, quod incendium dicitur. Huic autem sensui et illud creditur non inconvenienter opitulari, quod per Danielem dicitur: Millia millium ministrabant ei, et decies millies centena millia assistebant ei . Aliud namque est ministrare, aliud assistere, quia hi administrant Deo, qui et ad nos nuntiando exeunt; assistunt vero qui sic contemplatione intima perfruuntur, ut ad explenda foras opera minime mittantur.